Di surcivecchi vi vogliu cuntari,
ca sulu di notti si vidinu vulari.
‘Na vota c’era ‘a paci ni la terra,
po’ tra surci e anceddri (1) ci fu guerra.
Li surcivecchi vinniru chiamati:
sapiri comu avianu a essiri cullucati.
«Veru ca semu vecchi, ma videmu,
ca surci comu a vantri, nantri semu!»
Po' a l'anceddri arrispunneru di 'sta manera:
«Avemu l'ali e avemu a stessa bannera!»
Quannu eranu l'anceddri ca vincivanu,
‘i surcivecchi cu chisti si nni ivanu;
quannu eranu ‘i surci c’avianu furtuna,
‘i surcivecchi cangiavanu cumpagnuna.
‘Stu jocu, però, a longu nun putìa durari,
e surci e anceddri si nni eru addunari;
misiru di latu, allura, li so battibecchi
e ficiru ’a guerra, tutti du’, e surcivecchi.
Picchì li surcivecchi volanu di notti?
Picchì li surcivecchi volanu di notti?
-Ca surci e anceddri ci vonnu dari botti!
(Pino Bullara)
(1) Uccelli